Ministri i Shëndetësisë, Arben Vitia, thotë se sot do të takohen me përfaqësues të Bashkësisë Islame të Kosovës për të vendosur nëse do të ndalet falja e xhumasë nesër nëpër xhami, për shkak të rrezikut të përhapjes së koronavirusit.
Qeveria e Kosovës me anë të një vendimi i ka ndaluar dje tubimet publike për shkak të parandalimit të shpërndarjes së koronavirusit.
Megjithatë, akoma nuk është vendosur nëse komuniteti mysliman në Kosovë do ta falë namazin e xhumasë këtë të premte.
“Me Bashkësinë Islame do të vëmë kontakt qysh sot dhe do të koordinohemi në këtë drejtim në më të mirën e qytetarëve dhe besimtarëve në këtë rast”, ka thënë Vitia.
Sidoqoftë, vetë BIK-u dje ka konfirmuar se nuk është ndalur namazi i Xhumasë, mirëpo u ka bërë thirrje imamëve që hytben të mos e zgjasin më shumë se 10 minuta.
