Profesori universitar, Flamur Maloku, e ka kritikuar ashpër kryeministrin në ikje, Ramush Haradinajn, pasi ky i fundit e quajti kryeministrin në ardhje si mashtrues.
Maloku i ka përmendur numrin e ministrive dhe zëvendësministrave të Qeverisë së shkuar, duke nënkuptuar se qeveria e re ka shumë më pak.
“Kryeministri në ikje, i 23 ministrive, i rreth 80 zv.ministrave, i humbjes së 53-milionëshit, i përjashtimit nga EQAR-i dhe i dështimeve të tjera, e paksa quajtur mashtrues Albin Kurtin vetëm pse marrëveshja me LDK-në ka zgjatur. Koha është dëshmitari më i mirë thonë, por e kaluara është e ditur. E kaluara e qeverisë tënde dihet si ishte; korrupsion, nepotizëm dhe dështime diplomatike”, ka shkruar ai.
Sidoqoftë, Haradinaj dje pasi u bë publike arritja e marrëveshjes VV-LDK, e përmendi faktin se këto dy parti ishin vonuar dhe shtoi se “Kurti do të jetë mashtrim si kryeministër”.
Haradinaj edhe sot vazhdoi me fjalët e njëjta, duke përmendur rritjen e numrit të ministrive si mashtrim. Ai tha se Kurti është dashur ta pranojë që duhen më shumë sesa 12 ministri.
