I shembet pushteti Agim Bahtirit e Faruk Mujkës, iu shkarkuan komisionet para syve pasi humbën votat

Publikuar më:

Kryetari i Mitrovicës Agim Bahtiri dhe vartësi i tij Faruk Mujka, kanë humbur shumicën në Kuvendin Komunal, e kjo po bën që t’iu shembet pushteti.


Vetëm dje, dyshja e Komunës pati disa disfata në seancë. Pika e propozuar nga zyra e kryetarit për ta liruar nga taksa komunale KEDS-in dështoi, pasi nuk i kishin votat e nevojshme.

Po ashtu, në seancën e njëjtë, pushtetit iu rrënuan para syve edhe katër komisione nga opozita. Anëtarët e emëruar nga ta, u shkarkuan me shumicë votash.

E me seancën e djeshme, u konfirmua se pushteti ka humbur votat dhe nuk po mund të kalojë asnjë pikë pa votat e opozitës.

Kjo ka nervozuar kryetarin Agim Bahtiri, i cili sot tha se pikërisht bashkimi i opozitës e ka bindur që të garojë sërish.

“Edhe pse e kam shqyrtuar gjatë mundësinë e tërheqjes nga politika për t’u kthyer te familja në Holandë, pazaret dhe intrigat e PDK-së dhe marionetës së saj, LDK-së, më kanë bindur se duhet të rikandidohem për kryetar për mos t’i lënë këto dy parti mashtruese dhe zhvatëse të kthehen në krye të komunës sikur para 2013-së”, ka thënë ai.

Sidoqoftë, edhe kandidimi i Bahtirit akoma nuk është konfirmuar, pasi nevojitet përkrahja nga dega e VV-së, të cilën aktualisht nuk e ka pas vetes. Po ashtu, siç është raportuar, Bahtiri ka humbur simpatinë e Albin Kurtit, pasi ky i fundit ka në plan ta kandidojë Armend Mujën, analistin nga Mitrovica.

JU REKOMANDOJMË