Mitrovica u trondit pasditën e sotme, pasi brenda 8 minutash u gjenden dy të vdekur në rrugë.
Fillimisht u raportua për një të vdekur në rrugën “Ali Zeneli”, shkruan “Jepi zë”.
Policia e konfirmoi rastin për “Jepi zë”, duke bërë të ditur që bëhet fjalë për një 77 vjeçar i cili vdiq në veturën e tij. Për të, raportohet se ka qenë vdekje natyrore.
“Sot , rreth orës 17:20, është raportuar se në rrugën ‘ Ali Zeneli” në Mitrovicë, është gjetur pa shenja jete viktima mashkull reth 77 vjeçar. Hetuesit policor me autorizim të prokurorit kan nisur hetimet për rastin”, tha Avni Zahiti.
Mirëpo, del se 8 minuta para këtij rasti, në Mitrovicë u gjet edhe një trup tjetër i pajetë.
Policia thotë se trupi i një 56 vjeçari u gjet në rrugën “Fadil Deliqi”.
“Sot rreth orës 17:12, është raportuar se në rrugën ‘ Fadil Deliqi” në Mitrovicë, është gjetur pa shenja jete viktima mashkull reth 56 vjeçar. Hetuesit policor me autorizim të prokurorit kan nisur hetimet për rastin. Me urdhër prokurorit trupi i pa jetë dërgohet në IML për obduksion”, ka thënë Avni Zahiti për “Jepi zë”.
Theksojmë se që të dy rastet po konsiderohen vdekje të dyshimta dhe Policia po heton.
