Qeveria e Kosovës gjatë ditës së djeshme emëroi bordin e përkohshëm të ndërmarrjes Trepça.
Emërimi i bordit të përkohshëm të Trepçës erdhi pasi Qeveria e Kosovës në mbledhjen e 28 shkurtit mori vendim për shkarkimin e bordit të vjetër. Mirëpo, një nga njerëzit e emëruar sërish si pjesë e bordit nuk është emër i ri. Në fakt ai vetëm një javë më parë u shkarkua nga ky bord, për t’u emëruar sërish dje si pjesë e tij.
Emërimi i Shyqri Sadikut ka ngjallur pakënaqësi te Sindikata e Trepçës. Ata thonë emërimi i i Sadikut si përfaqësues i punëtorëve në bordin e përkohshëm mbikëqyrës të Trepçës është bërë pa miratimin e punëtorëve, minatorëve dhe inxhinierëve të kësaj ndërmarrje.
Në reagimin e tyre thuhet se Sadiku njëkohësisht është edhe drejtor i prodhimit në minierën e Stantërgut, çka sipas tyre paraqet konflikt interesi.
“Ne konsiderojmë se ky vendim duhet të rishqyrtohet nga qeveria e R. Kosovës, për arsye se fillimisht kemi të bëjmë me konflikt interesi, për shkak se i njëjti (Shyqyri Sadiku) është drejtor i prodhimit në minierën e Stantërgut (pozitë ekzekutivi), si dhe ishte drejtor bordi në bordin paraprak të shkarkuar si rezultat i performancës së dobët dhe konkurseve në Trepça Sh.A”, thuhet në reagimin e tyre.
Emërimi i Sadikut si pjesë e bordit të Trepçës ka ngjallur pakënaqësi edhe tek banorët e Shalës, të cilët madje kanë paralajmëruar edhe protesta për të hënën.
Ndryshe, Shyqri Sadiku njihet si i afërt me Lëvizjen Vetëvendosje.
Kujtojmë se Qeveria e Kosovës me 28 shkurt ka shkarkuar bordin drejtues të ndërmarrjes publike Trepça me pretendimet se ishte politik dhe se ka marrë vendime që ishin në kundërshtim me interesin e ndërmarrjes publike Trepça.