Një dukuri shqetësuese dhe alarmante po shënon rritje të vazhdueshme në qytetin e Mitrovicës, ku gjithnjë e më shumë fëmijë dhe të rinj po bien pre e përdorimit të substancave narkotike.
Sipas të dhënave dhe vëzhgimeve profesionale, tashmë edhe fëmijë të moshës 10 deri në 15 vjeç po ekspozohen ndaj drogave, ndërsa faktorët socialë, problemet familjare dhe mungesa e perspektivës po konsiderohen si shkaqet kryesore të kësaj përhapjeje alarmante.
Kanabisi vazhdon të jetë substanca më e përdorur, por shqetësuese mbetet edhe rritja e rasteve të përdorimit të kokainës si dhe abuzimi me medikamente pa recetë mjekësore.
Vetëm gjatë vitit të kaluar, në Mitrovicë të Jugut janë regjistruar dhjetëra raste të pacientëve që kanë kërkuar ndihmë mjekësore si pasojë e abuzimit me substanca psikoaktive, duke ngritur alarmin për shëndetin publik dhe sigurinë e të rinjve.
Specialisti i Psikiatrisë në Spitalin e Përgjithshëm në Mitrovicë të Jugut, Gëzim Shabani, ka theksuar se trendi është në rritje.
“Bazuar në vëzhgimet klinike dhe në krahasimin e rasteve të paraqitura në vitet e fundit, vërehet një tendencë e lehtë deri e moderuar e rritjes së numrit të pacientëve që kërkojnë trajtim për çrregullime të lidhura me përdorimin e substancave psikoaktive”, ka deklaruar ai për Radion Evropa e Lirë.
Kjo situatë po shihet si një thirrje urgjente për institucionet lokale, familjet dhe shoqërinë civile që të veprojnë sa më shpejt për të parandaluar përhapjen e këtij fenomeni që rrezikon drejtpërdrejt të ardhmen e të rinjve në Mitrovicë
