Katër zyrtarë policorë mbetën të lënduar pas përleshjeve që ndodhën mes tifozërive të Prishtinës dhe Trepçës.
Finalja e Superkupës së Kosovës në Basketboll, e zhvilluar mes dy klubeve të sipërpërmendura, u ndërpre dy herë – një herë gjatë çerekut të parë, e edhe në përfundim të çerekut të dytë, në të dyja rastet si shkak i hedhjes së mjeteve piroteknike në fushë.
Pas ndërprerjes së dytë, zyrtarët e ndeshjes vendosën të largojnë të gjithë tifozët nga tribunat, në mënyrë që të mund të vazhdojë ndeshja. Si pasojë, vazhdimi i ndeshjes u shty për rreth një orë.
E Flora Ahmeti, zëdhënëse e Policisë së Kosovës për Rajonin e Prishtinës, tha për Klankosova.tv se sot rreth orës 18:00, në Pallatin e Rinisë, gjatë ndeshjes basketbollistike mes Prishtinës dhe Trepçës, ka ndodhur një incident, “ku tifozët duke dëmtuar sallën, janë gjuajtur mes vete me mjete të forta, me ç’rast kanë lënduar 4 zyrtarë policorë, të cilët ishin në detyrë, të angazhuar për menaxhimin e situatës”.
Ajo theksoi se nga ana e tifozëve, deri më tani nuk është raportuar për ndonjë të lënduar.
“Pas vënies nën kontroll të situatës, policia në koordinim me prokurorin e shtetit, kanë nis një hetim për identifikimin dhe arrestimin e peronave të dyshuar për veprat ‘Sulm ndaj personit zyrtar’ dhe ‘asgjësim apo dëmtim i pasurisë’”, theksoi Ahmeti.