Që nga mëngjesi i sotëm, pjesëtarët e Policisë së Kosovës janë duke bërë kontrolle të rrepta për automjetet që hyjnë në zonën e Spitalit të Mitrovicës në Bair.
“Jepi zë” ka siguruar pamje nga hyrja e Spitalit në Bair, ku shihet një polic. Zyrtarë spitalorë i kanë thënë gazetës se forca të shtuara të Policisë janë parë që nga mëngjesi.
Ndërkohë, kontrolla të njëjta po bëhen edhe në spitalin e veriut. Zëvendësdrejtori i Policisë së Kosovës për Rajonin e Veriut, Besim Hoti, ka thënë se një aksion është duke u zhvilluar në të gjithë Kosovën, pasi një person nga Prishtina kërcënoi me sulme në spitalet e Kosovës.
“Policia u kontaktua nga një person i cili kërcënoi të sulmonte dikë në spital, por pasi që ky person nuk tregoi kush ishte dhe në cilin qytet do të kryente sulmin, policia, për arsye parandaluese, po siguron spitalet në të gjithë Kosovën”, tha Hoti.
Ndërkohë, forca të shtuara të Policisë janë në oborrin e QKUK-së ku po ruajnë edhe me armë të gjata.
