Në kohën kur lloçi ka mbuluar disa pjesë të qytetit, kryetari i Komunës po merret me politika rajonale, duke kritikuar “Minishengenin”.
“Jepi zë” raportoi sot për një rrugë që prej disa vitesh gjendet në gjendje të mjerueshme, e po ashtu në vazhdimësi ka raportuar për situatën në disa pjesë të qytetit. Por, Agim Bahtiri po vazhdon të merret me gjëra të tjera.
Zyrtari i VV-së ka kritikuar kryeministrin Shqipërisë, Edi Rama dhe presidentin e Kosovës, Hashim Thaçi, për të cilët thotë se për agjenda personale po hyjnë në marrëveshje me Serbinë në dëm të Kosovës.
Postimi i Agim Bahtirit:
Më shumë se për “mini-shengen” me Serbinë, Shqipëria duhet të kujdeset që të lehtësoj qarkullimin e njerëzve dhe mallrave me Kosovën, duke mos vendosur tarifa rrugore e barriera doganore. Kur të arrihet lëvizje e plot e lirë mes shqiptarëve të dy shteteve, atëherë Shqipëria dhe Kosova në koordinim me njëra tjetrën duhet ta lehtësojnë qarkullimin kufitar me shtetet mike rajonale.
Përderisa shteti i Serbisë i udhëhequr nga Vuçiqi vazhdon ta dëmtoj Kosovën në çdo aspekt, shteti shqiptar nuk bën të hyj në marrëveshje rajonale me Serbinë, e cila e lë anash Kosovën. Si rezultat i dështimit në postet e tyre, Edi Rama me “mini-shengen” dhe Hashim Thaçi me biseda për marrëveshje përfundimtare me Serbinë, po marrin iniciativa personale për të qenë personalisht në qendër të vëmendjes mediale.Treshja Rama-Vuçiq-Thaçi po tregohen aventuristë të humbur, në kohën kur mendësia qeverisëse në Kosovë ka ndryshur me kryeministrin në ardhje, z. Albin Kurti, i cili për dallim nga ta nuk e ka në agjendë interesin personal, por interesin shtetëror.