Është gjetur pa shenja jete Musli Krasniqi nga fshati Begaj i komunës së Vushtrrisë, i cili ishte raportuar si person i zhdukur nga data 28 tetor.
Lajmin e ka konfirmuar zëdhënësi i Policisë për rajonin e Mitrovicës, Avni Zahiti.
Sipas tij, Policia së bashku me ekipin e Njësisë së kërkim-shpëtimit të Forcës së Sigurisë së Kosovës, sot e kanë gjetur në një pusetë trupin e pajetë të qytetarit Musli Krasniqit nga Begaj i komunës së Vushtrrisë.
“Trupi i pajetë është dërguar për obduksion, ndërsa rasti po trajtohet si vdekje e dyshimtë”, ka thënë Zahiti.
Ndryshe, ka qenë vetë kandidatja për deputete nga LDK-ja, Rrezarta Krasniqi, e cila ka siguruar një ulëse në Kuvendin e Kosovës, që kishte njoftuar ditë më parë se kushëriri i saj, Musli Krasniqi, ishte zhdukur.
