Një nga shtyllat kryesore të klubit mitrovicas të basketbollit, Drilon Hajrizi, shprehet i bindur se ndeshja e fundit të serisë së gjysëmfinales me Prishtinën do të mbahet mend.
Ai beson se që të dyja ekipet tashmë e njohin njëra-tjetrën mirë pasi kanë luajtur katër ndeshje me radhë, shkruan “Jepi zë”.
“Është ndeshja e fundit e serisë gjysëmfinale. Kemi luajtur 4 lojë, i dijmë përparësitë dhe mangësitë e njëra-tjetrës. Do të jetë lojë e cila mund të mbahet mend”, ka thënë Hajrizi.
Në një prononcim për “Jepi zë”, Drilon Hajrizi shprehet i bindur në fitore, nëse angazhimi do të jetë si në ndeshjen e fundit në Mitrovicë. 12-shi i Trepçës thotë se tifozët e kanë motivuar ekipën dhe po iu qëndrojnë pranë në çfarëdo rrethane.
“Jemi të motivuar maksimalisht, tifozët e kanë kryer punën e tyre, kanë motivuar ekipën dhe po qëndrojnë krah nesh në të mirë dhe në të keq. Nëse angazhohemi si në lojën e fundit, jam i bindur që loja do të jetë në favorin tone”, ka thënë Hajrizi për “Jepi zë”.
Kujtojmë se ndeshja e fundit në mes të Prishtinës dhe Trepçës do të mbahet këtë të diel në Prishtinë, pas katër ndeshjeve të cilat u fituan nga skuadrat që luanin në palestrat e tyre. Fituesi i kësaj ndeshjeje, do të përballet në finale me Pejën./jepize.com