Nga hoteli 5-yje në akomodim më të dobët dhe përplasje me ofendime – 17 udhëtarë nisin procedura ligjore, ndërsa versionet e palëve bien në kundërshtim të drejtpërdrejtë. Udhëtarët pretendojnë se ndryshimi i hotelit është bërë pa paralajmërim dhe në kundërshtim me ofertën e konfirmuar, duke e cilësuar rastin si mashtrim dhe mospërmbushje kontrate.
Ata thonë se, përveç kushteve më të dobëta të akomodimit, janë përballur edhe me mungesë organizimi dhe komunikim të papërshtatshëm nga agjencia. Në anën tjetër, pronari i “GMICA Travel” insiston se u janë ofruar kushte më të mira dhe e cilëson reagimin si të ekzagjeruar. Megjithatë, dokumentet, komunikimet dhe denoncimet zyrtare të dorëzuara në institucione hedhin dyshime serioze mbi këtë pretendim.
Një udhëtim turistik treditor në Korfuz të Greqisë, i organizuar nga agjencia e udhëtimeve “GMICA Travel” me bazë në Lipjan, ka përfunduar me denoncime zyrtare në Polici dhe në mekanizmat shtetërorë për mbrojtjen e konsumatorit.
Një grup prej 22 udhëtarësh kosovarë, të cilët ishin nisur më 4 qershor, janë kthyer të dielën mbrëma, më 7 qershor, duke pretenduar mospërmbushje të kontratës dhe ndryshim të njëanshëm të agjendës.
Sipas denoncimit të dorëzuar nga udhëtarët, agjencia kishte kontraktuar dhe konfirmuar vendosjen e tyre në hotelin “Mitsis Belvedere”.
Megjithatë, pas mbërritjes në Greqi, ata janë akomoduar në “Hotel Panorama”, i cili, sipas tyre, nuk plotësonte kushtet e premtuara, nuk kishte qasje të përshtatshme dhe grupi ishte lënë pa guidë dhe pa përkujdesje.
Avokatja Edona Sina, përmes një njoftimi zyrtar të dërguar të hënën, më 8 qershor, ka bërë të ditur se 17 persona nga ky grup tashmë kanë vendosur të ndjekin rrugët ligjore:
“Grupi është kthyer mbrëmë nga Greqia, të gjithë të pakënaqur për shkak të mashtrimit për ndryshimin e hotelit dhe mospërmbushjen e programit, siç ka qenë e publikuar agjenda. Duke mos u mjaftuar me kaq, pronari ka përdorur gjuhë ofenduese dhe të papërshtatshme me të gjithë grupin përmes telefonit. Andaj, 17 persona nga grupi kanë vendosur të vazhdojnë procedurat institucionale me avokat kundër Gmica Travel, me pronar Miran Fejzullahu, me qëllim që qytetarët e tjerë të mos bien pre e këtij mashtrimi – të paguajnë diçka tjetër dhe t’u ofrohet krejt diçka tjetër, shumë më keq se oferta që është publikuar dhe konfirmuar me foto, pa paralajmërim, duke mos dhënë asnjë përgjegjësi, duke e mbyllur telefonin, pa kërkim falje, përkundrazi duke i shoqëruar me ofendime të rënda”, ka thënë ajo.
I kontaktuar nga redaksia e Insajderit, pronari i agjencisë “GMICA Travel”, Miran Fejzullahu, përmes telefonit, në një bisedë të regjistruar, ka konfirmuar ndryshimin e hotelit, por ka mohuar se ka dëmtuar klientët. Sipas versionit të tij, agjencia i ka vendosur ata në një hotel të një kategorie më të lartë, duke pretenduar se hoteli i parë i planifikuar kishte qenë i kategorisë me 3 yje, ndërsa ai i ka akomoduar në një hotel me 4 yje.
Megjithatë, kjo deklaratë bie ndesh me ofertën publike të vetë agjencisë, të cilën e posedon redaksia.
Në materialet reklamuese të “GMICA Travel” në rrjetet sociale, hoteli i premtuar fillimisht, “Mitsis Belvedere Corfu”, është i pasqyruar zyrtarisht si i kategorisë me 5 yje, çka nënkupton se vendosja e grupit në një hotel me 4 yje përbën ulje të standardit të kontraktuar dhe jo ngritje të tij.
Më tej, Fejzullahu ka deklaruar për Insajderin se pretendimet po zmadhohen për interesa financiare nga avokatja e rastit, e cila, sipas tij, ka pasur një familjare në këtë udhëtim dhe ka kërkuar kompensim monetar, duke shtuar se “vetëm ajo po e bën të madhe këtë punë”.
Por pretendimi i tij se bëhet fjalë për një reagim të izoluar të avokates rrëzohet nga fakti se procedurat ligjore janë autorizuar zyrtarisht nga 17 udhëtarë të ndryshëm të atij grupi.
Për më tepër, komunikimet me shkrim të siguruara nga numri zyrtar i agjencisë tregojnë se ishte vetë menaxhmenti i kompanisë ai që ofronte kthim të pjesshëm parash, duke përdorur edhe cilësime në baza krahinore:
“Klientët tanë janë shumë të kënaqur me shërbimin, me hotelin kam komplimente…” shkruhet fillimisht në mesazhet e agjencisë drejtuar avokates, ndërsa më pas shtohet oferta e kompensimit:
“Po për prindërit tuaj po ua kthej nga 10 euro edhe i pajtojmë, se ju gjakovarët… veç pak me jav kthye 10 euro jeni tepër në rregullt. Ose 8 euro po jav kthejmë”, thuhet në mesazh.
Në denoncim gjithashtu pretendohet se gjatë komunikimeve telefonike, sa grupi ndodhej në Greqi, menaxhmenti i agjencisë ka përdorur gjuhë ofenduese dhe tejet të papërshtatshme ndaj udhëtarëve dhe familjarëve të tyre që kërkonin llogari për ndryshimin e hotelit.
Sipas njoftimit të bërë në Ministrinë përkatëse, në Departamentin për Mbrojtjen e Konsumatorëve, në vend që të ofronte përgjegjësi apo kërkim-falje për mospërmbushjen e agjendës së publikuar, pronari i agjencisë ka zgjedhur t’i shoqërojë klientët me ofendime të rënda dhe t’ua mbyllë telefonin.
Përkundër pretendimeve të agjencisë, institucionet shtetërore tashmë kanë regjistruar ankesat.
Denoncimi është regjistruar zyrtarisht përmes sistemit digjital më datë 5 qershor 2026 në stacionin policor në Lipjan, ku agjencia ka selinë e saj operative.
Te Ministria e Industrisë, Ndërmarrësisë dhe Tregtisë (MINT), rasti është hapur në Departamentin për Mbrojtjen e Konsumatorit, i cili ua ka konfirmuar denoncuesve zyrtarisht pranimin e ankesës nga udhëtarët e dëmtuar, duke e protokolluar lëndën nën numrin përkatës të identifikimit.
