Një konflikt mes disa personave në Mitrovicë ka eskaluar në dhunë serioze, duke përfunduar me lëndime të rënda, dëmtim prone dhe zbulim të armëve e narkotikëve.
Ngjarja ka ndodhur më 28 prill 2026 rreth orës 06:05, ku fillimisht mosmarrëveshja kishte nisur afër Muzeut në Mitrovicë mes Mergim Imerit, rreth 27-vjeçar dhe Benhur Mehmetit, rreth 34-vjeçar, për t’u përshkallëzuar më pas në fshatin Frashër, në drejtim të Pantinës.
Në përfshirje të konfliktit ka hyrë edhe Kamer Imeri, rreth 45-vjeçar, babai i njërit prej të dyshuarve, ndërsa si pasojë e përplasjes, viktima A.Rr., rreth 26-vjeçar ka pësuar lëndime të rënda trupore, përfshirë frakturë në dorën e djathtë, për çka ka pranuar trajtim mjekësor. Gjatë incidentit i është dëmtuar edhe vetura.
Pas ndërhyrjes së Policisë dhe në koordinim me Prokurorin e Shtetit, është kryer bastisje në shtëpinë e Mergim Imerit, ku janë gjetur dhe sekuestruar:
një fishek i kalibrit 9×19 mm,
një shufër metalike,
një qese me substancë të dyshuar narkotike të llojit kokainë me peshë 2.9 gram.
Me vendim të Prokurorit:
Mergim Imeri është ndaluar për 48 orë për “Posedim të paautorizuar të narkotikëve” dhe “Armëmbajtje pa leje”, Kamer Imeri është ndaluar për “Lëndim të rëndë trupor” dhe “Asgjësim apo dëmtim të pasurisë”, ndërsa Benhur Mehmeti për veprën penale “Sulm”.
Rasti është nën hetime dhe autoritetet po vazhdojnë me procedurat e mëtejshme.
