Një vrasje po dyshohet se ka ndodhur mëngjesin e sotëm në rrugën “Rrustem Statovci” në Ferizaj.
Rastin e ka konfirmuar prokurori Veton Shabani, i cili ka thënë se sipas dyshimeve të para, po dyshohet se ka ndodhur një vrasje brenda familjes.
“Ka dyshime për vrasje. Mjekësia Ligjore e Ka marrë trupin e pajetë të viktimës, obduksioni do ta sqarojë situatën më detajisht. Por dyshimet e para janë se kemi të bëjmë me vrasje”, ka thënë Shabani.
Shabani ka bërë të ditur se viktima ka jetuar me djalin e saj, i cili sipas informatava të para nga vendi i ngjarjes, është i dyshuar kryesor.
“E ndjera ka jetuar me një djalë të saj, që sipas infiormatave të para, ka të meta mendore. Është dërguar për ekzaminim te psikiatri. I dyshuar për momentin është djali, policia e ka marrë dhe është duke u trajtuar nga psikiatri”, ka deklaruar Shabani për Express.
Rastin e ka konfirmuar edhe zëdhënësi i policisë për rajonin e Ferizajt, Agim Gashi.
“Mund të konfirmoj që ka ndodhur një vrasje në komunën e Ferizajt. Njësiti policor ka dalë në vendin e ngjarjes bashkë me mjekun i cili edhe ka konstatuar që viktima e gjinisë femërore ka ndërruar jetë. Hetimet ende nuk i kemi përfunduar. Një person është arrestuar. Personi që dyshohet për vrasjen është familjar i viktimës.”, ka thënë Gashi për Reporterin.
