Glauk Konjufca: Valdete Daka është përbetuar për eliminimin e Albin Kurtit

Publikuar më:

Kandidati për deputet nga radhët e Lëvizjes Vetëvendosje, Glauk Konjufca ka bërë një reagim një ditë pasi kryetarja e KQZ-së, Valdete Daka tha se ndihet e kërcënuar nga deklaratat e tij.


Konjufca ka shkruar se sot u pa qartë se për çka e pati fjalën kur tha se Valdete Daka është koka e planit për stopimin e VV-së dhe të Albinit.

Reagimi i Konjufcës vjen pasi që Zyra për Certifikim tha se kandidatët i plotësojnë kushtet për t’u certifikuar nga KQZ.

Konjufca ka shkruar se nëse bordi politik i KQZ-së i mbivendoset Zyrës profesionale të Certifikimit, kjo përfundimisht e fundos pavarësinë e këtij institucioni bashkë me demokracinë dhe të drejtat e njeriut.

“Sot u pa qartë për çka e pata fjalën pardje kur thashë që Valdete Daka është koka e planit për stopimin e VV-së dhe të Albinit. I ftoj tash të gjithë ata që dje i thonin VV-së “të respektohet ligjshmëria”, këtë parim ta thonë edhe një herë e me zë të lartë tash që Zyra e Pavarur e Certifikimit i dha të drejtë Albin Kurtit. Nëse ky rekomandim nuk zbatohet, atëherë kush nuk po i zbaton vendimet “veç kur nuk po i konvenojnë”? VV-ja a Valdete Daka?
Nëse bordi politik i KQZ-së i mbivendoset Zyres profesionale të Certifikimit, kjo përfundimisht e fundos pavarësinë e këtij institucioni bashkë me demokracinë dhe të drejtat e njeriut. Të drejtat e njeriut dhe demokracia nuk mund të determinohen nga një forum politik, drejtuesja e të cilit, siç po tregon me sjelljen e saj, është përbetuar për eleminimin e Albin Kurtit nga gara e barabartë zgjedhore”, ka shkruar ai.

Në ora 17:30, KQZ-ja do të mblidhet për të vendosur për çertifikimin ose jo të kandidatëve që kanë probleme me ligjin.

JU REKOMANDOJMË