Më shumë se 350 serbë nga Leposaviqi, Zveçani, Zubin Potoku, Mitrovica e Veriut, Graçanica dhe Anamorava e Kosovës u nisën sot në mëngjes drejt Kraljevës, ku presidenti i Serbisë, Aleksandar Vuçiq, do të marrë pjesë në inaugurimin e segmentit të autostradës Morava, nga Adrani deri në Preljinë.
Pas kësaj, grupi do të vazhdojë rrugën drejt Beogradit, ku Partia Përparimtare Serbe do të mbajë një tubim në prag të festës së Vidovdanit.
Siç mund të shihet në pamjet e publikuara nga Kosovo Online dhe TV Most, grupi nga Zubin Potoku përbëhet nga disa dhjetëra persona.
Në mesin e atyre që u nisën për në Kraljevë janë edhe banorë të Graçanicës.
Një grup prej disa dhjetëra të rinjsh, kryesisht të papunë ose pa një vend pune të përhershëm, iu bashkua nismës për të mbështetur Vuçiqin. Ata udhëhiqen nga Ivan Nedeljkoviq nga Kosova Qendrore, i cili është parë edhe më parë në tubimet në Beograd (Parku Pionirski). Ai njihet edhe si një nga pjesëmarrësit në marshimin në këmbë që mbante ikonën e Shën Nikollës gjatë ecjes, gjithashtu në shenjë mbështetjeje për presidentin Vuçiq, raportoi Kim.
