Telefoni i ri që e bleu në një MobilShop në Prishtinë, nuk e bëri rehat një qytetar, i cili me celularin e ri u kthye të nesërmen aty. Mirëpo, ndonëse problemi ishte te telefoni, një ankesë e tij nuk u prit mirë nga stafi i MobilShop, madje, ai pretendon se njëri prej punëtorëve e sulmoi.
Një qytetar kishte shkuar për të blerë një telefon të ri në një Mobil Shop në Prishtinë të shtunën rreth orës 16:00. Ani pse zgjedhjen dhe blerjen e kishte bërë brenda ditës, ai u detyrua që të kthehet përsëri të nesërmen në atë MobilShop, pasi që telefoni i ri nuk i punonte si duhet.
Burimet e Sinjalit brenda Prokurorisë bëjnë të ditur se punëtori i MobilShopit ia kishte marrë telefonin dhe i kishte thënë që të kthehet në lokal pas një orë, derisa ta bën instalimin e disa aplikacioneve.
Çfarë ndodhi pas një orë dhe si përfunduan palët në stacion policor?
Një orë më vonë, qytetari kthehet në MobilShop, mirëpo telefoni nuk i qe rregulluar ende. Këtu fillon konflikti.
Qytetari kishte filluar që të shprehte pakënaqësitë e tij për zvarritjen e punës, kur pretendon se punëtori i nervozuar e ka gjuajtur me telefon, duke e goditur në pjesën e gjoksit.
Klienti i cili e ka lajmëruar rastin në Polici, u ka thënë hetuesve policorë se është ndjerë i frikësuar.
Burimet e Sinjalit bëjnë të ditur se palët janë intervistuar dhe Prokurori ka urdhëruar që ndaj punëtorit të MobilShopit të iniciohet rasti “Sulm”.