Një incident ka ndodhur para pak minutash në lagjen Shipol të Mitrovicës.
Disa persona janë gjuajtur me armë të gjata, por për fat nuk raportohet për viktima, shkruan “Jepi zë”.
Gazeta ka mësuar nga burime të sigurta se aty janë përdorur armë të llojit kallash.
Rastin e ka konfirmuar edhe zëdhënësi i Policisë, Avni Zahiti, i cili ka treguar se janë gjetur edhe gëzhoja.
“Sonte rreth orës 22:00, është raportuar se në rrugën “Dëshmorët e Kombit” në Mitrovicë, ishin dëgjuar të shtëna, njësitet policore kanë dalë në vendin e ngjarjes, ku në cilësi të provës materiale kanë gjetur një gëzhoj. Nga inflrmacionet e deritanishme nuk raportohet për të lënduar”, ka thënë Zahiti për “Jepi zë”.
Ndërkohë, dëshmitarët i kanë thënë gazetës se nuk dihen motivet e ngjarjes, por mësohet se të përfshirë janë pronarët e dy bizneseve të njohura në Mitrovicë.
Sipas tyre, ata janë pronarët e një kompanie të taksive dhe një kompanie që shet pjesë të veturave.
Policia po vazhdon të qëndrojë në vendin e ngjarjes dhe po heton shkaqet.