Pandemia ka gjunjëzuar bizneset kosovare, e më të prekurat janë ato të Mitrovicës, qytetit më të varfër në Kosovë.
E si të mos mjaftonte kjo, bizneset mitrovicase përballeshin me një ditë më pak të punës, prej se e diela u bë pushim, shkruan “Jepi zë”.
Heqja e të dielës, ditës kur qarkullimi ishte thuajse sa tri ditë të javës, goditi rëndë bizneset. Siç ishte raportuar edhe më herët, u desh të largoheshin dhjetëra punëtorë nga puna.
Mirëpo, ka disa javë që e diela është bërë normale në qytetin e Mitrovicës, dhe banorët e kësaj zone mund t’i lënë paratë brenda qytetit.
Disa punëtorë i kanë thënë dje gazetës se kanë fituar vendin e punës që e kishin humbur kohë më parë. Ata thonë se, kur u ftuan në punë, pronarët u thanë se iu nevojitet më shumë staf për të dielën dhe ditët e tjera.
Ata thonë se janë mbi 100 punëtorë të tjerë që kanë fituar vende të punës, si në markete, qendra tregtare dhe biznese të tjera që goditeshin nga pushimi i obliguar i të dielës.
Sidoqoftë, asamblistët kanë votuar që e diela të bëhet ditë pune dhe ligjshmërinë e vendimit e ka konfirmuar edhe Ministria përkatëse.