Një plagë në kokë e shkaktuar nga arma e zjarrit ia mori jetën Florim Haxhidemës, 32-vjeç, nga Ferizaj, të dielën në mbrëmje.
32-vjeçari u gjetë pa shenja jete në një apartament banesor në rrugën “Sejdi Sejdiu” rreth orës 22:40, njoftoi sot Policia e Kosovës përmes një komunikate për media.
“Gjatë ekzaminimit të vendit të ngjarjes është konstatuar një plagë që dyshohet se është shkaktuar nga arma e zjarrit”, njoftoi Policia. “Në vendngjarje janë gjetur dhe sekuestruar një pistoletë dhe një gëzhojë”.
Apartamenti ku u vra Haxhidema është në pronësi të të dyshuarit për vrasjen e rëndë që tronditi qytetin e Ferizajt. Ai është Muhamet Begisholli, 48-vjeçar, shtetas i Kosovës me banim në Francë, raporton Paparaci.
Begisholli është ndaluar me urdhër të Prokurorit të Shtetit si i dyshuar për vrasje të rëndë, tha sot Policia e Kosovës.
Në momentin e krimit të rëndë, në aparament ndodheshin edhe bashëshortja dhe vajza e të dyshuarit, e cila ka pësuar lëndime trupore.
“Nga hetimet fillestare rezulton se ngjarja ka ndodhur në banesën e M.B. (48 vjeç), ku në momentin e incidentit ndodheshin aty bashkëshortja, si dhe vajza e tij A.R. (24 vjeçe)”, tha Policia. “Kjo e fundit ka pësuar lëndime trupore dhe është dërguar për trajtim mjekësor në Qendrën Klinike Universitare të Kosovës (QKUK).”
Vajza 24-vjeçe e të dyshuarit, po ashtu është ndaluar për 48-orë në cilësinë e të dyshuarës për krimin, sipas njoftimit të Policisë.
Të dhënat publike tregojnë se Muhamet Begisholli, shtetas i Kosovës, është banues në Paris të Francës.
Sipas të dhënave në internet të publikuara nga autoritetet franceze, Begisholli rezulton se drejton një biznes si sipërmarrës individual në Francë.
Biznesi i regjistruar nën emrin tregtar “Begisholli.Diola”, sipas Regjistrit Kombëtar të Ndërmarrjeve (RNE) në Francë, aktivitet kryesor rezulton ta ketë tregtinë e drunjve dhe ka selinë në Coulommiers, një vendbanim rreth 60 kilometra në lindje të Parisit, kryeqytetit francez.
