Komuna e Skenderajt pak ditë më parë vuri gurthemelin e ndërtimit të memorialit ‘Dalja e parë publike e UÇK’së’ në Llaushë të Skenderajt.
Memoriali nuk po ndërtohet tek varrezat e Llaushës aty ku kishe dalë publikisht për herë të parë Ushtria Çlirimtare e Kosovës, por po ndërtohet në oborrin e shkollës në këtë fshat.
Nga komuna e Skenderajt kanë thënë për Insajderin se oborri i shkollës në Llaushë është e vetmja pronë publike që ishte e përshtatshme në aspektin teknik të realizimit të projektit, derisa theksuan se në atë oborr është vrarë mësuesi Halit Geci.
“Memoriali i daljes publike të UÇK-së po ndërtohet në oborrin e shkollës në Llaushë, aty ku edhe është vrarë mësuesi Halit Geci, në rrugën regjionale Skenderaj- Klinë. Në ditën e daljes publike, nxënës, mësimdhënës por dhe mijëra qytetarë janë nisur nga shkolla e fshatit me arkivolin e mësuesit Halit për tek varrezat e Llaushës, aty ku është bërë dalja publike e UÇK-së. Si komunë kemi qenë në komunikim të vazhdueshëm më banorët e fshatit Llaushë sidomos për caktimin e lokacionit të memorialit dhe e vetmja pronë publike që ishte e përshtatshme në aspektin teknik të realizimit të projektit por edhe në përfaqësimin e vlerave dhe rëndësisë së asaj ditë ishte hapësira tek shkolla e fshatit, gjë e cila është mirëpritur gjerësisht nga banorët e Llaushës por dhe me gjerë“, tha zëdhënësi për media, Amir Lushtaku.
Por, këtë vendim të komunës nuk e priti mirë Sabit Geci. Ai akuzoi komunën se po përpiqen të ndryshojnë historinë.
Ish eprori i UÇK-së pak ditë më parë i quajti zyrtarët komunal ‘hajna’ e ‘dilingji të poshtër’.
Por, siç duket Geci i ka rënë pishman për deklaratën e tij të para disa ditëve. Ai sot për Insajderin tha se është pajtuar me zyrtaret komunal që të mos nxjerr telashe rreth këtij projekti.
“Unë e kam ba një marrëveshje me Drejtorin e monumenteve historike, jem ra dakord çdo gjë me rregullu, jam pajtu mos me sjellë ma telashe rreth asaj pune“, tha Geci.
Gazeta Insajderi ka kontaktuar edhe familjen e mësuesit të vrarë Halit Gecit, të cilët kanë thënë se vendin e memorialit e ka vendosur komuna dhe se ata ishin të pranishëm në ceremonin e gurthemelit.