Kryeministri në detyrë, Albin Kurti, është lëshuar në lavdata për ministrin në detyrë të Bujqësisë, Faton Peci, në ditën kur ky i fundit u intervistua në cilësinë e të dyshuarit për pesë orë radhazi nga hetuesia lidhur me një kontratë për mbetje shtazore, e cila peshonte 60 milionë euro.
Kurti, me anë të një shkrimi në ‘Facebook’ e ka vlerësuar punën e Pecit si të mirë dhe të suksesshme teksa ka folur për panairin ‘Agrokos & Agroturizëm’.
“Panairi AGROKOS & Agroturizëm 2025 – një ngjarje e përvitshme ku përfaqësohen prodhues të kulturave bujqësore, përpunues të frutave dhe të produkteve blegtorale, kompani të makinerive bujqësore, pijeve artizanale, ambalazhimit dhe standardizimit dhe agroturizmi, një sektor i cili po kthehet në një pasuri të re për vendin tonë. E kjo padyshim është edhe rezultat i trajtimit me prioritet e seriozitet që i kemi bërë sektorit të bujqësisë dhe qeverisjes së mirë e të suksesshme të ministrit të linjës, Faton Peci”, thuhet në shkrimin e Kurtit.