Një aksion i përbashkët mes Policisë së Kosovës dhe KFOR-it ka rezultuar me ndalimin e disa automjeteve të dyshuara për kontrabandë në veri të vendit.
Siç njofton Policia, operacioni është zhvilluar më 21 maj rreth orës 18:10, në një rrugë ilegale në fshatin Gnjezdan të komunës së Leposaviqit, ku janë ndaluar gjashtë kombi transportues dhe një veturë me targa të Serbisë, të ngarkuara me mallra të ndryshme.
Sipas Policisë, automjetet po drejtoheshin nga gjashtë shtetas të Serbisë dhe një qytetar i Kosovës. Në to janë gjetur mallra me vlerë mbi 26 mijë euro, përfshirë produkte ushqimore, mobile e mjete teknike pune, për të cilat dyshohet se ishin të destinuara për tregti ilegale.
Automjetet dhe ngarkesat janë sekuestruar nga njësitë kufitare të Drejtorisë Rajonale Kufitare – Veri, ndërsa rasti po hetohet edhe nga Dogana dhe Administrata Tatimore e Kosovës, për procedura të mëtejshme.