Pas sulmit të realizuar nga lojtarët dhe tifozët vushtrrias ndaj lojtarëve të Trepçës është ndërprerë ndeshja e hendbollit.
Fillimisht Halim Miftari i Vushtrrisë goditi një lojtar të Trepçës dhe më pas u krijua tollovi mes lojtarëve. Portieri rezervë i Vushtrrisë vrapoi dhe ndezi situatën. Më pas kishte hedhje të shisheve e gjësendeve të ndryshme të forta në drejtim të lojtarëve të Trepçës.
Më pas kanë hyrë huliganë të ndryshëm në fushën e lojës dhe kanë goditur me grushte e shkelma lojtarët e Trepçës.
Sulmi ka zgjatur për disa minuta, ndërsa janë përfshirë edhe zyrtarë të klubit Vushtrria.
Në palestrën në Vushtrri kishte policë, por që nuk ofruan fare siguri për skuadrën mysafire. Ndeshja u ndërpre në fillim të pjesës së dytë, kur Trepça kishte epërsi prej katër golave.
Me gjithë sulmin e rëndë, zyrtarët e ndeshjes kanë bërë përpjekje për ta vazhduar ndeshjen. Por këtë e ka refuzuar Trepça që kishte lojtarë të sulmuar e të lënduar.