Në objektin e Ministrisë së Administrimit të Pushtetit Lokal (MAPL) në Mitrovicën e Veriut, u mbajt takimi i parë i Bordit të Përbashkët, i cili u kryesua nga ministri ne detyrë Elbert Krasniqi në cilësinë e përfaqësuesit të Kryeministrit Albin Kurti. Në takim ishin të pranishëm edhe vetë Kryeministri Kurti, Kryetari i Komunës së Mitrovicës së Veriut, Erden Atiq, nënkryetari Arian Tahiri, si dhe anëtarët e bordit nga të dy komunat.
Ky bashkëpunim është i paraparë me Ligjin për Kufijtë Administrativë të Komunave, i cili përcakton themelimin e një Bordi të Përbashkët funksional ndërmjet komunave përkatëse, me qëllim të bashkërendimit të veprimeve dhe ndërtimit të një qasjeje të integruar në qeverisje lokale.
Themelimi i këtij bordi ndërmjet Komunës së Mitrovicës së Veriut dhe Komunës së Mitrovicës së Jugut përfaqëson një model të ri të bashkëpunimit institucional, që synon përmirësimin e jetës së përditshme të qytetarëve në të dy anët e qytetit të ndarë.
Përmes koordinimit në fusha kyçe si infrastruktura, mjedisi, zhvillimi ekonomik dhe shërbimet komunale, Bordi i Përbashkët pritet të shërbejë si një mekanizëm konkret për realizimin e projekteve të përbashkëta. Ky mekanizëm gjithashtu kontribuon në ndërtimin e besimit ndërmjet komuniteteve dhe rritjen e efikasitetit në ofrimin e shërbimeve publike.
“Me përfaqësim të barabartë nga të dy komunat dhe nën mbikëqyrjen e përfaqësuesit të Kryeministrit, ky bashkëpunim vlerësohet si një shembull i qeverisjes së mençur dhe i përkushtimit ndaj interesit të përbashkët të qytetarëve, pa asnjë dallim”, ka shmruan ministri ne detyrë Krasniqi
