Inxhinieri Sabit Aliu ka ndarë një përvojë interesante që hedh dritë mbi cilësinë e dikurshme të prodhimeve industriale në Kosovë, krahasuar me ato të sotmet, ka shkruar “Jepi zë”.
Ai ka gjetur pas 35 vjetësh një bateri të vjetër të prodhuar nga fabrika e Trepçës, tip 12V55Ah, dhe vendosi ta peshojë për kurreshtje.
“E mata në peshore dhe doli pesha specifike 17.10 kg — më e rëndë se një akumulator i sotëm 12V75Ah,” shkruan Aliu në një postim në Facebook.
Për krahasim, ai peshoi edhe një bateri moderne me të njëjtin kapacitet (12V55Ah) të cilën e gjejmë sot në treg, dhe ajo rezultoi të kishte vetëm 12.79 kg, pra rreth 4 kg më e lehtë se ajo e prodhuar në Trepçë.
“Dhe çuditemi pse tani afati i qëndrueshmërisë është shumë më i shkurtër se sa ka pasur bateria e prodhimit tonë në Trepçë,” shton ai me një ton kritik ndaj cilësisë së produkteve të sotme.
Sabit Aliu shpreh keqardhje për faktin që fabrika dikur prestigjioze si Trepça sot janë lënë në mëshirën e fatit dhe shumë prej makinerive e aseteve të saj janë trajtuar si mbeturina.
“Në tregun e Kosovës hynë gjithçka, e fabrika jonë ka mbetur në mëshirën e fatit, kohës dhe shitjes për mbeturina,” përfundon ai.