Një rast i posedimit të municionit pa leje është regjistruar të dielën në fshatin Rashan të komunës së Mitrovicës, ku një person është kapur nga Policia me dy fishekë të qiftes (llovaçkës) në xhepin e pantallonave.
Burimet e Sinjalit bëjnë me dije se gjatë intervenimit të policisë pas një rasti të ndarë për dhunë në familje, njësitë patrulluese kanë hasur në oborrin e një shtëpie të dyshuarin D.S., të cilit gjatë kontrollit fizik i janë gjetur dy fishekë.
Sipas deklaratës së dhënë para hetuesve, i dyshuari ka pohuar se fishekët i ka gjetur në mal, ndërsa gjatë kontrollit të shtëpisë nuk është gjetur ndonjë armë apo municion tjetër.
Hetuesit kanë njoftuar Prokurorin Kujdestar, i cili ka autorizuar inicimin e rastit për veprën penale “Mbajtja në pronësi, kontroll ose posedim të paautorizuar të armës”. Pas intervistimit, i dyshuari është liruar në procedurë të rregullt, ndërsa rasti mbetet nën hetim.
Vlen të theksohet se i dyshuari nuk ka qenë i përfshirë në rastin e dhunës në familje, por është vëllai i të dyshuarit të atij rasti, i cili po hetohet në një procedurë të veçantë.