Policia e Kosovës ka arrestuar personin e katërt të dyshuar për përfshirje në veprën penale “Vjedhje e rëndë në tentativë”, që ndërlidhet me dy raste të raportuara më 21 qershor në Mitrovicën e Veriut.
I dyshuari, V.I. (i lindur në vitin 1998), është ndaluar pas hetimeve të vazhduara dhe dyshohet se ka qenë i përfshirë në rastin e parë, ku persona të panjohur tentuan të depërtojnë në një lokal në rrugën “Vasilija Ostroskog”, por u zmbrapsën pas aktivizimit të alarmit.
Policia kishte arrestuar menjëherë tre persona të tjerë të dyshuar – Z.B. (2005), A.S. (2000) dhe M.H. (1995) – të cilët u ndaluan më 21 qershor rreth orës 22:50 në rrugën “Nemaninja”, pas një tentim-vjedhjeje në një shtëpi private në rrugën “Çlirimi”.
Me vendim të prokurorit, të katër të dyshuarve u është caktuar masa e ndalimit prej 48 orësh. Policia e Kosovës ka theksuar përkushtimin e saj për ta luftuar krimin dhe për t’i sjellë para drejtësisë të gjithë personat e përfshirë në veprimtari të kundërligjshme.