Anëtari i LDK-së, Egzon Pacolli ka dalë edhe me emra të tjerë për grantet e dhënë me nga 100 mijë euro nga Ministria e Bujqësisë e udhëhequr nga Faton Peci.
Në videon e publikuar në Facebook, Pacolli i LDK-së thotë se drejtori i Zhvillimit Ekonomik në Komunën e Podujevës e që udhëhiqet nga VV-ja, Vigan Salihu, përfitoi 96 mijë e 300 euro nga ministria e udhëhequr nga Faton Peci.
“Krejt familjarët i kishit pas bujkë e fermerë a”, shtron pyetjen Pacolli i LDK-së, ndërsa thotë se me 100 mijë euro është shpërblyer nga Ministria e Bujqësisë edhe Kushtrim Nimoni, djali i axhës së shefit të kabinetit të Albulena Haxhiut, Genc Nominit.
Përveç këtyre dy emrave, grant sipas Pacollit të LDK-së, nga kjo Ministri ka fituar edhe Veton Mulliqi, këshilltar politik i Ministrit të Administrimit të Pushtetit Lokal, Elbert Krasniqi, njëherit familjarë i Besnik Bislimit.
“Faton publikoji sa pare i kanë fituar njerëzit e afërt me VV-në, sepse në 6 raste dolën 600 mijë euro”, thotë anëtari i LDK-së në videon e publikuar.
Egzon Pacolli i LDK-së kishte njoftuar javën e kaluar përmes një videoje në Facebook, se 100 mijë euro Ministria e Bujqësisë ia kishte dhënë në formë granti për një shtallë, vëllait të deputetes së VV-së, Fitore Pacolli, Burim Pacollit, ku kontrata me firmën e tij “Alda Farm Ria”, është nënshkruar me 16 korrik, ndërsa firma ishte hapur veç 4 ditë ma herët, me 12 korrik.
Një 100 mijëshe tjetër ishte dhënë në formë granti nga kjo Ministri edhe për këshilltarin e jashtëm politik të Ministrit Peci, Naim Huruglica.
Por, përmes një vendimi, më 22 nëntor, të premten e kaluar, këto dy grante ishin pezulluar përkohësisht deri në një vendim përfundimtar.