Ndonëse bëjnë një prej punëve më të vështira, minatorët e gjigantit metalurgjik “Trepça”, po vazhdojnë të kenë probleme me paga. Si për janarin, problem doli edhe për pagat e shkurtit.
Sipas minatorëve të Trepçës, të cilët kanë biseduar me “Jepi zë”, pagat e shkurtit nuk kanë dalë as sot kur po shkon 10 marsi, datë që ishte caktuar si e fundit për t’i marrë pagat.
Minatorët i kanë thënë “Jepi zë” se kur u përfundua greva e fundit pasi iu doli paga e janarit, ata ishin dakorduar që pagat e shkurtit të dilnin më së largu deri më 10 mars. Sipas tyre, menaxhmenti nuk e mbajti fjalën.
Për t’i pyetur rreth çështjes së pagave, gazeta ka kontaktuar kompaninë “Trepça” në e-mailin zyrtar, mirëpo ende nuk ka marrë ndonjë përgjigje.
Sidoqoftë, nga Miniera i kanë konfirmuar jozyrtarisht gazetës “Jepi zë” se kompania nuk i ka paratë për t’i realizuar pagat. Ata po presin ende ndihmën e Qeverisë.
E ndihma e Qeverisë që bëri të mundur që minatorët të marrin të paktën rrogën e janarit, nuk është ekzekutuar e plotë. Ministri në detyrë Muharrem Nitaj kishte konfirmuar se Qeveria ka ndarë 3 milionë euro, mirëpo duket se ato nuk janë realizuar të tëra.
Ndryshe, minatorët e Trepçës vazhdimisht kanë probleme me paga. Vetëm muajin e kaluar dhe fillimin e këtij muaji, ata protestuan e grevuan për të marrë paratë që ju takojnë./Jepize.com
