Problemet me Universitetin “Isa Boletini” në Mitrovicë nuk kanë të ndalura.
Përveç “dallavereve” me punësime, rrahje e mosmenaxhim efikas, ky institucion nuk ka arritur t’i akreditojë disa programe studimore, shkruan Jepi zë.
Në mesin e tyre janë edhe dy programe ku si bartës ishin vetë rektori Alush Musaj dhe prorektorja Ajtene Avdullahu.
Në dokumentin e siguruar nga “Jepi zë” sqarohen të gjitha arsyjet pse nuk janë akredituar këto programe.
– Drejtimi Inxhinieri dhe Teknologji Ushqimore (Master), si bartës të programit kishte rektorin Alush Musaj, Aziz Behrami dhe Bahtir Hyseni. Mirëpo Këshilli Shtetëror të Cilësisë i Agjencisë së Kosovës për Akreditim ka konstatuar që Musaj dhe Behrami nuk përkojnë me fushën e studimit, ndërsa Hyseni nuk e ka nostrifikimin e diplomës, me ç’rast nuk është riakredituar ky drejtim.
– Drejtimi Financa dhe Kontabilitet (Master) ku bartës të këtij drejtimi ishin prorektorja Ajtene Avdullahu dhe Esat Durguti, nuk është akredituar pasi profesoresha Avdullahu nuk përkon me fushën e studimit.
– Inxhinieri dhe Teknologji Ushqimore (Bachelor) bartës të programit ishte caktuar Valdet Gjinovci, Dilaver Salihu, Fatos Rexhepi, Mirsade Osmani, ndërsa ky drejtim nuk u riakreditua pasi Valdet Gjinovci përveç që nuk përkon me drejtimin, ai mban edhe dy punë të tjera.
–Gjeoinformatikë dhe menaxhim i gjeoresurseve (Bachelor) si bartës ka pasur Naser Pecin, Behxhet Shalën dhe Festim Kutllovcin, mirëpo as ky drejtim nuk akreditua pasi profesorët Peci dhe Shala ishin transferuar nga një drejtim tjetër i akredituar, por ky transferim nuk e kishte marrë miratimin e KSHC-së.
– Programi Makineri prodhuese (Master) si bartës kishte Hakif Zeqirin dhe Labinot Kastratin, mirëpo ky drejtim nuk u riakreditua pasi profesori Krasniqi nuk përkon me fushën e studimit.
Ky vendim i Këshillit Shtetëror të Cilësisë i Agjencisë së Kosovës për Akreditim është marrë më datë 21.12.2021, në mbledhjen e mbajtur nën monitorimin e Ambasadës Shteteve të Bashkuara të Amerikës në Prishtinë dhe dy organizatave të shoqërisë civile në Kosovë, ORCA dhe BIRN.