Lëvizja Vetëvendosje duket se ka nisur “ta lëshojë dorën” në punësime, e së fundmi edhe në gradime me karakter nepotist.
Siç raportoi sot “Jepi zë”, zyrtari i VV-së Burim Hajdini u bë drejtor vetëm disa javë pasi u anëtarësua në këtë parti.
Por, historia e “kapjes” së Trepçës nga VV-ja, nuk përfundon këtu. Gjithçka nisi në kohën e Qeverisë Kurti, kur u emërua një bord i përkohshëm që konsiderohej si i afërt me pushtetin. Ata kishin krijuar disa lidhje në kompani, që tani po sjellin frytet.
Rezultati i parë ishte emërimi si u.d i kryeshefit të kompanisë Enes Muzaqin, njeriu që dje ngriti në detyrë zyrtarin e VV-së, Burim Hajdinin.
Enesi rezulton të jetë familjar i afërt me nënkryetarin e Vushtrrisë dhe kryetarin e degës së VV-së në këtë komunë, Besim Muzaqin.
Burime të “Jepi zë” brenda partisë dhe Minierës, kanë thënë se Enesi është familjar shumë i afërt me Besimin, nënkryetarin e Komunës, i cili është njeriu më me ndikim në degën e Vushtrrisë.
Sidoqoftë, vlen të theksohet se gjatë këtyre kohëve, në Minierën Trepça ka vazhduar të shtrihet edhe ndikimi i partive të tjera, si PDK-ja e AAK-ja. Disa të afërt me këto parti kanë marrë pozita të rëndësishme në ndërmarrje.