Banorët e Kçiqit të Madh prej muajsh e kanë ngritur zërin kundër gurthyesit të vendosur mbi fshatin e tyre, por askush nuk po i merr parasysh.
Ata madje kishin organizuar një peticion, i cili duket se ka hasur në vesh të shurdhër, e për këtë ata janë revoltuar, shkruan “Jepi zë”.
Banorët e këtij fshati kanë bllokuar rrugën që dërgon tek gurthyesi, duke vendosur vetura e traktorë në rrugë.
Arsye për protestë, sipas tyre, është mohimi i zërit të tyre protestues, që u bë përmes thirrjeve dhe peticionit.
Qytetarët e atij lokaliteti pretendojnë se gurthyesi po ua dëmton pronën e përbashkët, dukë lënë pa ujë fshatin, si dhe duke dëmtuar rrugët. Dëmtimi i natyrës së fshatit, për banorët e Kçiqit, është i papranueshëm.
“Jepi zë” ka raportuar në vazhdimësi për operimin e këtij gurthyesi që, sipas raportimeve, ka “ngrënë” gjysëmn e kodrës së njohur si “Kodra e Cërnushës”.