Anëtari i Këshillit të Përgjithshëm të Lëvizjes Vetëvendosje, Sadri Ramabaja ka publikuar një fotografi, portret, të tij nga debati televiziv në Pressing disa orë pasi lëshoi studion e këtij emisioni në mes të transmetimit të hënën.
Ramabaja ia ka bashkëngjitur një përshkrim fotografisë së publikuar mesnatën e së hënës, disa orë pasi u bë protagonist i braktisjes së debatit televizv në T7.
“Në jetë si lisat e Medokës sime – me rrënjët thellë në tokën që i themi Atdhe, e ballin lart”, ka shkruar ai.
Ramabaja ka lëshuar emisonin ‘Pressing’ që transmetohet në T7 pas një përplasje me Nol Nushin nga Partia Socialdemokrate.
Nushi e ofendoi Ramabajën. I tha se “nuk ka dinjitet”, teksa të dy po debatonin për grevën e mësimdhënësve. Ramabaja vendosi të tërhiqej nga debati dhe ta braktiste studion e emisionit.
Pas kësaj ndodhie të papritur, autori i emisionit, Leonard Kërçuki vendosi ta ndërpresë emisionin pasi u shpreh se “nuk është në rregull kështu pa panelistin Ramabaja”.
