Policia e Mitrovicës shpeshherë “mbyll sytë” para rrahjeve e gjuajtjeve me armë duke mos arritur të kap të dyshuarit, ndërkohë që u tregua shumë vigjilente dhe zbuloi kush shkruajti muralet në qytet para disa ditësh.
Ata kanë arrestuar dhe shoqëruar katër persona në Stacionin Policor Jugu, si të dyshuar për shkrimin e grafiteve nëpër qytet, shkruan “Jepi zë”.
Ndaj tyre, siç mëson gazeta, është iniciuar rast i kategorizuar si “Prishje e Rendit dhe Qetësisë Publike”. Këtë gjë e ka konfirmuar për “Jepi zë”, zëdhënësi Avni Zahiti.
“Me datën 25.04.2021, në Mitrovicë, është iniciuar një rast Prishje e Rendit dhe Qetësisë Publike “PRQP’.Në cilësi të të dyshuarave janë intervistuar katër persona, pasi të njëjtit në orët e pasdites së datës 25 prill 2021, në disa lokacione/ objekte në qytet kanë shkruar grafitë”, ka thënë Zahiti.
Ndërkohë, gazeta ka mësuar që nga personat e arrestuar, një është burrë ndërsa tri të tjera janë gra. Ata janë mbajtur 6 orë në Stacionin Policor.
Sidoqoftë, para disa ditësh u vendosën disa grafite feministe në qytet, që shkaktuan mjaft shumë polemika./Jepize.com
