Sot ka nisur të largohet asfalti në Parkun e Qytetit në Mitrovicë, që u shtrua muaj më parë.
Nga Komuna kanë konfirmuar për “Jepi zë” se investitori është pajtuar ta largojë.
Edhe pronari Besart Baruti, ka thënë për gazetën se nga vullneti i mirë ka pranuar ta largojë asfaltin, ani se i posedon të gjitha dokumentet.
Sipas tij, edhe nga Komuna edhe nga Ministria i ka dokumentet për këtë projekt, por është pajtuar ta largojë duke i dhënë rast Komunës ta gjejë një zgjidhje alternative.
Duhet theksuar se rruga ishte shtruar në kuadër të projektit për ndërtimin e Qendrës Tregtare ART MALL, e cila pritet të punësojë mbi 1000 persona.
Ndryshe, projektin për ndërtimin e Qendrës Tregtare e kanë votuar asamblistët e të gjitha partive politike.