Kryetari i Kuvendit Komunal, Safet Kamberi, i cili njëherazi është edhe Kryetar i LDK-së në Mitrovicë ka ngritur një paralele në lidhje me shquarsinë e Mitrovicës pas skandalit me teatrin, për të cilin raportoi ekskluzivisht “Jepi zë”.
Nënkryetari i Komunës së Mitrovicës, Faruk Mujka, që njëherazi është edhe Kryetar i LVV në Mitrovicë, u raportua se ka punësuar me nepotizëm familjarë të tij e anëtarë të VV në teatrin e qytetit.
E për këtë, Kamberi u shpreh se për ironi skena e teatrit po shfaqë të vërtetën: nepotizmin në Mitrovicë.
Ai ka ngritur një paralele për Mitrovicën si qytet i industrisë e kulturës ku thotë se derisa e para u shkatërrua nga lufta, e dyta po shkatërrohet nga politikat e pandërgjegjshme.
Me këtë rast ai ftoi Faruk Mujkën dhe Agim Bahtirin që t’i anulojnë këto përzgjedhje për të treguar se nuk po keqpërdorin funksionet institucionale për interesa partiake e familjare.
Postimi i plotë i Kamberit:
Si për ironi, edhe në këtë rast, teatri është skena që nxjerrë në pah shfaqjen e së vërtetës. E vërteta pra është pikërisht ajo që ndodhi me teatrin Muharrem Qena. Nepotizëm.
Mitrovica si qytet dikur shquhej me industrinë dhe kulturën.
Të parën na e shkatërroj lufta, e të dytën po e shkatërrojnë politikat e pandërgjegjshme nga politikanë që nuk kanë kurrfar ndjesie për shpirtin e qytetit tonë, pra kulturën.
E ftoj edhe publikisht Kryetarin e Komunes dhe të VV-së në Mitrovicë që të reflektojnë, ta anulojnë përzgjedhjen e familjarëve të tyre në pozitat që i kanë emëru, si shenjë që ata nuk po i keqpërdorin pozitat e tyre për interesat e veta partiake e familjare.