Ikja e kosovarëve po vazhdon. Në vitin 2021, sipas Agjencisë së Statistikave, saktësisht 42 mijë persona kanë lënë Kosovën. Apo 117 qytetarë në ditë. Numri i ikjeve të qytetarëve pritet të rritet gjatë viteve të ardhshme pasi që me 1 janar 2024 kosovarët do të kenë të drejtë të udhëtojnë pa viza në vendet e Bashkimit Evropian. Por edhe pse trendet janë negative, kryeministri i Kosovës Albin Kurti sot tha se synon diçka të paimagjinushme, që t’a rikthejë mërgatën në vendlindje. A mund të ndodhë një gjë e tillë?
Me anë të një video në Instagram, Kryeministri Kurti, ka thënë se rruga jonë është rrugë për kthimin e mërgatës, shtimin e energjisë dhe ngritjen e arsimit.
Agjencia e Statistikave
Trendi i ikjës së qytetarëve nuk u ndalë as pas fitores së Vetëvendosjes dhe ndryshimeve të mëdha politike që ndodhën në Kosovë.
Sipas Agjencisë së statistikave, numri i emigrantëve kosovarë gjatë vitit 2021 është vlerësuar të jetë gjithsej 42,728 banorë, duke përfshirë emigrantët legalë dhe ata ilegalë.
Pra, duke u bazuar në këtë statistikë, përgjatë vitit 2021, mbi 3500 qytetarë e kanë lëshuar vendin brenda një muaji, apo rreth 117 qytetarë janë larguar çdo ditë nga Kosova.
Në bazë të këtij institucioni, pjesa dërmuese e emigrantëve për vitin 2021 ishin emigrantët legalë për motive të bashkimit familjar, martesave, gjetja e një vendi të punës dhe shpërnguljes së përhershme.
Opozita
Një muaj më parë, kryetari i PDK-së, Memli Krasniqi ka thënë se gjatë dy viteve të Qeverisë Kurti, mbi 107 mijë qytetarë kanë ikur nga Kosova.
“Mesatarisht 147 persona në ditë e lëshojnë Kosovën për një jetë më të mirë, mesatarisht mbi 1000 qytetarë në javë. Gjatë dy viteve të Qeverisë Kurti, 107 mijë e 310 qytetarë ikën nga Kosova, jo si turistë por si mërgimtarë që humbën shpresën në perspektivën që mundet me e ofru shteti ynë. Nga çdo kategori sociale. Vendi ynë po shpopullohet dhe familja jonë po zvogëlohet. Ky migrim i paprecedent tregon se sa të kënaqur janë njerëzit me qeverisjen tane”, u shpreh Krasniqi në seancën e Kuvendit, me 6 prill.
Anëtari i Kryesisë së LDK-së, Muhamet Hamiti, ka reaguar sot, për videon e Kryeministrit Kurti.
Përmes një shkrimi në Facebook, Hamiti, ka thënë se kryeministri po flet për kthimin e mërgatës, ndërsa vetëm gjatë qeverisjes së tij kanë ikur 100 mijë qytetarë nga Kosova.
“‘Rruga jonë është rrugë për kthimin e mërgatës’, paska thënë kryeministri Kurti sot në një video. I buzëqeshur, i vetëkënaqur, kryeministri e thoshte këtë ndërsa në dy vitet e fundit, gjatë qeverisjes së tij të ‘shpresës’, mbi 100.000 kosovarë të zhgënjyer e kanë braktisur vendin dhe e kanë rrritur mërgatën që Kurti thotë se do ta kthejë. Ikja e kosovarëve nga vendi “është diçka normale”, thoshte para 10 ditësh zëvendësi i Kurtit, Besnik Bislimi. Kjo Qeveri e Kosovës po i përzë qytetarët e Kosovës, po e rrit mërgatën tonë, me synimin për ta kthyer mërgatën! A s’është absurde kjo?”, ka shkruar Hamiti.
Sipas tij, kjo Qeveri po e katandis Kosovën çdo ditë e më keq.
“Qeveria e Albin Kurtit po i përbuz qytetarët e Kosovës, po ua mbyt shpresën dhe po ua fyen inteligjencën. Katandisja e Kosovës nuk ndalet pa shkuar kjo Qeveri. Natyrisht, kjo është në dorën e qytetarëve të Kosovës, e atyre që e kanë votuar dhe e atyre që s’e kanë votuar këtë Qeveri demagogësh”, ka shkruar Hamiti.
Edhe deputetja e LDK-së, Hykmete Bajrami, ka drejtuar një numër të madh të akuzave ndaj Qeverisë Kurti, pikërisht për çështjen e ikeve së qytetarëve.
Ajo ka thënë se kjo qeveria nuk po bën asgjë për ta ndalur ndaljen e ikjen e profesionisteve shëndetësor, mësuesve dhe punëtorëve të administratës.
“Po ikin profesionistët shëndetësor, mësuesit, punëtorët e administratës, të gjithë ata që me kontrata në sektorin publik më herët ndjehëshin të sigurt, merrnin kredi dhe e planifikonin jetën në Kosovë”, ka shkruar ajo. /Nacionale