Ushtruesi i detyrës së kryetarit të Organizatave të Veteranëve të Luftës së UÇK (OVL UÇK), Faton Klinaku, ka thënë se rritja e pensioneve për 20% për veteranët e UÇK-së do të jetë 34 euro.
Ai në postim ka përmendur se si kjo Qeveri ka hequr nga paga minimale veteranët e UÇK-së dhe si rrjedhojë rritja për ta do të jetë vetëm 34 euro.
“Meqenëse ky pushtet i ka hequr veteranët e luftës së UÇK-së nga paga minimale në Kosovë (350€), nga 170€ sa i kanë marrë do të thotë se me këtë ka pasur zbritje prej 180€. E tash, vendimi prej 20% rritje në kohë fushate është 34€. Pra, në vend se veteranët t’i merrnin 350€, tash do t’i marrin 204€” – ka shkruar ai në Facebook më 10.01.2025.
Klinaku po ashtu ka thënë se kanë kaluar katër vite dhe çështja e verifikimit të veteranëve nga kjo Qeveri, sipas tij, ka qenë vetëm farsë.
“Më e pakta që duhet të bëjnë veteranët e luftës së UÇK-së dhe familjet e tyre, është që mos t’i besojnë më mashtrimit” – ka shkruar në fund Klinaku.
Në mbledhjen e mbajtur më 10.01.2025, Qeveria e Kosovës aprovoi rritjen prej 20% të pensioneve për dëshmorët, invalidët, veteranët, pjesëtarët e UÇK-së, viktimave civile dhe familjeve të tyre.
Në konferencën e mbajtur pas mbledhjes, ministri i Financave, Hekuran Murati ndau detaje se sa para do të marrin këto kategori.
Murati tha se për familjet që kanë pasur një dëshmor, pensioni ka qenë 448 euro dhe do të rritet në 537 euro; për familjet që kanë dhënë dy dëshmorë, pensioni ka qenë 537 euro, derisa do të rritet në 806 euro; familjet me tre dëshmorë do të marrin 1,075 euro; familjet me katër dëshmorë kanë marrë 627 euro dhe pas rritjet do të marrin 1,344 euro ndërsa familjet me më shumë se katër dëshmorë do të marrin 1,613 euro.
Për kategoritë e invalidëve të luftës pensioni ka qënë 448 euro për invalidin më dëmtim trupor prej 80% ndërsa pas rritjes do të bëhet 537 euro.
Sipas këtij vendimi, ata që fitojnë mbi 20% janë familjet që kanë dëshmorë, të zhdukur apo viktima.
Ministri shtoi se ky vendim u bë për shkak të rritjes ekonomike e jo zgjedhjeve.
“Ka qëlluar që zgjedhjet të mbahen në muajin shkurt, po të mbaheshin në ndonjë muaj tjetër, përsëri do të ishte ky cikël, për shkak se buxheti miratohet në muajin tetor të vitit të kaluar e ekzekutohet në janar të vitit pasues”- bëri të ditur Murati.
