Tri subjekte që operojnë me derivate të naftës dyshohet se kanë shmangur taksa në vlerë prej 600 mijë eurosh.
Dogana ka bërë të ditur se këto tri subjekte, që kanë deklaruar ndërlidhje mes vete, kanë liruar në import derivate gjatë tri viteve të fundit duke i shkaktuar kështu dëm buxhetit të shtetit.
“Si rezultat është zbuluar lirimi i bazuar në dokumente të falsifikuara ndër vite, fillimisht nga këto tri subjekte që kanë deklaruar edhe ndërlidhjen mes vete. Dyshimi është se këto subjekte kanë liruar në import derivate duke i shkaktuar dëm buxhetit të shtetit prej mbi 600 mijë euro gjatë tre viteve të fundit”, thuhet në njoftimin e Doganës e cila ka zhvilluar dhe është duke zhvilluar inspektime për shmangie të detyrimeve doganore.
Dogana ka njoftuar prokurorin kujdestar dhe me vendim të prokurorit janë arrestuar personat përgjegjës të tri subjekteve të përfshira në këto procedura lirimi, përderisa hetimi do të vijojë në zbardhjen e rrethanave të këtyre rasteve.
Kujtojmë se mediat kanë raportuar se kompanitë e derivateve që u përfshin në këtë skandal ishin HIB Petrol, Alfa Trade si dhe Fer Petrol.
