Një gurëthyes që punon prej kohësh në një prej kodrave më të dukshme të Mitrovicës, ka bërë që të ankohen banorët e disa fshatrave.
Sipas banorëve të fshatit Cërrnushë, Kciq, Rashan e Pasomë, gurëthyesi po ua shkatërron kodrën më të madhe të asaj pjese.
Banorë nga këto fshatra i kanë shkruar “Jepi zë”, duke u ankuar për gurëthyesin. Ata kanë sjellur edhe pamje nga punimet atje, ku shihet se një pjesë e madhe e kodrës është “ngrënë” nga bagerët e kompanisë.
“Jemi shumë të inatosur me këtë gurëthyes. Po në rrënohet e gjithë kodra”, thotë një nga banorët e këtyre fshatrave.
Sipas tyre, përvec që kodra po “zhduket”, gurëthyesi po bën edhe dëme të tjera dhe po sjell problem tek qytetarët. Ata thonë se zhurma është e madhe dhe dëgjohet në fshatrat përreth, ndërkohë që kritika kanë edhe për dëmet që shkaktohen në rrugë.
“Na e ka prishë rrugën për tek varrezat e reja në Kciq”, thotë një banor i fshatit më të madh në Mitrovicë.
Sidoqoftë, “Jepi zë” ka raportuar edhe kohë më parë për problemet që kanë banorët rreth këtij gurëthyesi, sic është shkatërrimi i rrugës nga kamionët.