Kryetari i Skënderajt dhe njëherësh njëri prej djemve të familjes Jashari, Bekimi ka reaguar pasi në sheshin “Zahir Pajaziti” në Prishtinë është vendosur fotografia e motrës së tij të mbijetuarës së masakrës ndaj kësaj familjeje, Besartës.
Ai ka thënë se vendosja e fotografisë së saj është e papranueshme dhe jo njerëzore.
“Sapo më njoftuan që në sheshin “Zahir Pajaziti”, në Prishtinë, është vendosur një baner me motive politike, në të cilin është e vendosur edhe fotografia e motres sime, Besarta Jashari. Është e papranueshme, jo njerëzore dhe jo etike keqpërdorimi i personalitetit të motres sime, Besartes, për qëllime të caktuara politike”, ka shkruar ai në Facebook.
Ai tha se një veprim i tillë para zgjedhjeve nuk i bënë nderë historisë.
“Një veprim i tillë, në këtë kohë para zgjedhore i bërë nga kushdoqoftë nuk i bënë nder historisë dhe të kaluares sonë të lavdishme, as atyre që në emër të vlerave tona kombëtare tentojnë të përfitojnë politikisht”, ka shkuar ai.
Ai ka kërkuar nga organet e rendit dhe KQZ që të merren me rastin.
“Në lidhje me këtë kerkoj nga organet e rendit si dhe Komisioni Qendror i Zgjedhjeve që të verifikojnë mirë rastin dhe të veprojnë sipas legjislacionit në fuqi”, ka shkruar ai.