Biblioteka e Qytetit “Latif Berisha”, nuk po gjen rehati. Pasi vite më parë u bart nga objekti i vjetër i saj në një objekt përballë, lëvizje ka pasur edhe sot.
Të gjithë ekzemplarët e librave të kësaj biblioteke janë bartur në ambientet e Qendrës Multifunksionale “Omni Sport”, shkruan “Jepi zë”.
Kjo gjë ka sjell reagimin e shoqërisë civile, të cilët thonë se kjo është papërgjegjësi. Sipas aktivistes Nerimane Ferizi, ajo qendër nuk plotëson kushtet për lexim.
„Bibloteka u zhvendos ne OMNI sport, askush asnje fjale. Keshtu heshturazi ankohemi duke mos pase guximin me bertite. Biblotek levizeze, qe nuk gjeti strehen e duhur askund. Ju uroj lexim te mire nen zhurma tifozesh!”, ka thënë ajo.
E për ta thyer heshtjen, ka reaguar edhe aktivistja e re mitrovicase, Armela Hajra, e cila e quajti veprim të papërgjegjshëm.
„Sot, pas 4 viteve, Biblioteka qenka zhvendos prapë, tash në një qendër multi-funksionale sportive. Kjo përveç që tregon papërgjegjësinë tuaj, tregon që keni deficit sa i përket nivelit të logjikës me të cilin operoni, sepse si është e mundur që një student të mësoj në Bibliotekë nën zhurmën e tifozëve ose sportistëve? Por kështu ndodh kur nuk ka qytetari aktive dhe qytetarët nuk kërkojnë llogari për vendimet që i afektojnë ata“, ka shkruar Hajra.
Sidoqoftë, kjo ide kishte ardhur nga kryetari i komunës së Mitrovicës, Agim Bahtiri, i cili kishte thënë se „OmniSport“ plotëson kushtet dhe ka salla moderne.
“Duke u ndërlidhur me institucionet kulturore, gjatë kësaj mbledhje kryetari Bahtiri ka kërkuar nga DKRS-ja që të filloj edhe me procedurat për zhvendosjen e bibliotekës së qytetit në hapësirat e objektit të Qendrës Multifunksionale “Omni Sport”, pasi që janë hapësirat më moderne, me salla të leximit, dhe i plotësojnë të gjitha kushtet e nevojshme për qytetarët”, thuhej në komunikatën e Komunës.