Banorët e fshatit Kçiq i Madh nuk po rehatohen me gurthyesin që po ha kodrën e Cërnushës.
Ata do të protestojnë të shtunën, për të kundërshtuar punën e këtij gurthyesi, shkruan “Jepi zë”.
Protestën e ka konfirmuar përfaqësuesi i Këshillit të Fshatit, Imer Fejza, i cili ka ftuar qytetarët të bashkohen në protest.
“Të dashur banorë të Kçiqit të Madh, të dashur qytetarë të Mitrovicës, ambientalist nga i gjithë vendi. Nesër e shtunë, në ora 10:30, në rrugën e ‘Malit’, siç e quajm ndryshe tek ‘rruga e kuqe’, në emër të Këshillit të Fshatit Kçiq i Madh, ftoheni të merrni pjesë në protestën tonë paqësore në mbrojtje të ambientit, kundër Gurthyesit i cili po e dëmton atë! Bashkim për gjelbrim!”
Sipas banorëve, gurthyesi po shkatërron natyrën përreth si dhe po dëmton infrastrukturën e fshatit.
Po këta banorë, ditë më parë bllokuan rrugën që dërgon tek ky gurthyes në shenjë proteste, mirëpo askush nuk i mori parasysh.
Parasysh nuk u mor as një peticion i nënshkruar nga shumë banorë.
Sidoqoftë, ky gurthyes është në pronë të kompanisë “Lirigzoni”, të cilës i kanë reaguar banorët edhe më herët për dëmtimin e rrugëve të fshatit me makineri të mëdha.
