Aktivistja e shoqërisë civile, Neriman Ferizi, ka reaguar ashpër ndaj idesë për ta zhvendosur Bibliotekën e Qytetit në objektin e OmniSport, për çka raportoi “Jepi zë” ditë më parë.
Ferizi ka thënë se OmniSport është objekt i dedikuar për sport dhe sipas saj, ndonëse objekti ku gjendet tani biblioteka nuk i plotëson kushtet, njëlloj nuk i plotëson as OmniSport.
Sipas saj, ky objekt është ndërtuar si hapësirë për sport, ndërkohë që Biblioteka kërkon qetësi e jo zhurma.
Ferizi dyshon që ka plan që objekti aktual ku është Biblioteka, mund të lëshohet për biznese siç ka ndodhur me objektin e vjetër të Bibliotekës.
Reagimi i plotë i saj:
Në një lajm të publikuar në media thuhet që Komuna e Mitrovicës planifikon ta zhvendos Biblotekën e Qytetit në Qendrën Multifunksionale OMNI Sport.
Fillimisht, janë shqetësuese kushtet në të cilat gjendet bibloteka sot, por nuk i plotëson kushtet as hapësira në OMNI Sport. Ky objekt është ndërtu me qëllim të një hapsire sportive, nuk është planifikuar më herët për biblotekë. Bibloteka kërkon qetësi e jo zhurma tifozësh.
Në statutin e kësaj qendre multifunksionale mund ta shihni edhe vet që është e dedikuar për aktivitete sportive.
Por, këtu lind dyshimi që hapësirat e biblotekës ku gjendet ajo tani, do të shfrytëzohen nga biznismen për shkak të lokacionit të përshtatshëm për të bërë biznes. E që zakonisht bëhet me kontrata shumë vjeçare e që këto kontrata i kanë kushtuar Mitrovicës qysh nga koha e PDK-së sa ka qenë në pushtet.
Po ua kujtoj disa nga objektet e dhëna në këtë formë:
Qendra e Kulturës në Mitrovicë, ku gjendet edhe teatri, është e rrethuar me biznese të tilla me kontratë shfrytëzimi deri në 99 vite. Aty e keni Famour Bar, pastaj Riverside dhe Check-in. E që shpesh herë i pengojnë shumë aktivitetet që zhvillohen në këtë qendër.
Çka ndryshon udhëheqja e Agim Bahtirit me atë të PDK-së?
Ndryshojnë vetëm militantët, asgjë tjetër.