Kryetari i Komunës së Mitrovicës kishte deklaruar se ka milionat kur erdhi dhe mori postin e të parit të qytetit, mirëpo asnjëherë nuk tregoi konkretisht bizneset që kishte jashtë vendit.
Sidoqoftë, Agim Bahtiri rezulton milioner nga pronat e paluajtshme që ka. Sipas deklarimeve që i bëri në qershor të këtij viti, ai ka katër shtëpi e tokë bujqësore, vlera e të cilave arrin 7 milionë e 610 mijë euro, shkruan Jepi zë.
Një shtëpi e Bahtirit, ka vlerën e 860 mijë eurove, një tjetër 200 mijë, e dy të tjera nga 150 mijë euro.
Sipas deklarimeve, Bahtiri ka tokë bujqësore në vlerë hiç më pak se 6 milionë e 250 mijë euro.
Por, gjithë kjo pasuri nuk korrespondon shumë me paratë e gatshme që Bahtiri i ka në bankë. Ai ka deklaruar vetëm 20 mijë euro para të gatshme.
Të ardhura, sipas deklarimit, Bahtiri i ka vetëm dy rroga, atë të kryetarit që dikur thoshte se nuk e merr, dhe të fabrikës së këpurdhave prej 336 euro rrogë në muaj.
Kryetari i Mitrovicës ka deklaruar se posedon një veturë Q7, dhe nuk ka deklaruar dy Range Rovera, të cilat para një jave tha vetë që i ka në pronësi.
Në emission LIVE në T7 gjatë festës së Bajramit, Agim Bahtiri tha se i ka dy Range Rover të cilët, sipas tij, “ia kanë dhuruar djemtë”. Asnjë nga ta nuk gjendet në listën e deklarimeve.
Duhet theksuar se lista e deklarimeve është e vitit 2019, mirëpo në dokumente mund të përfshihen si shtojcë edhe pronat e tjera, pasi data e dorëzimit të deklarimit ka qenë në qershor të këtij viti.